जमिन बाँझो राखेर समृद्धि आउदैन्: मन्त्री अर्याल

पोखरा । भूमि व्यवस्था, सहकारी तथा गरिबी निवारण मन्त्री पद्मा अर्यालले जमिन बाँझो राखेर समृद्धि नआउने बताएकी छन् ।बुधबार पोखरामा आयोजित राष्ट्रिय सहकारी नीति, २०६९ को पुनरावलोकन सम्बन्धी प्रदेशस्तरीय गोष्ठीलाई सम्बोधन गर्दै उनले देशको समृद्धिको कल्पना भूमि उपयोग र उपभोगबाट मात्र सम्भव भएको बताइन् ।

‘चीनमा जग्गा–जमिन बाँझो राख्न पाइँदैन, नेपालमा आँगनको सुर्को पनि बाँझो छ’, मन्त्री अर्यालले भनिन् । सरकारले भूमि व्यवस्थापन र भूमि ऐन छिट्टै ल्याउने जानकारी दिदै उनले ऐन निमार्णसँगै तीन महिनाभित्र परिणाम आउने गरी काम गर्ने प्रष्ट पारिन् । छरपस्ट रहेको भूमिहरुलाई व्यवस्थापन गर्नका लागि भूमि बैंकको व्यवस्था गर्नेगरी ऐन संसदमा पेश भैसकेको उनले जानकारी दिइन्।

सुकुम्बासी समस्या र अव्यवस्थित समास्याको समाधानका लागि ऐन निर्माण गर्नुको विकल्प नरहेको उनको भनाइ छ । सुकुम्बासीको समाधान प्रकृति हेरेर व्यवस्थापन गर्ने मन्त्री अर्यालले बताइन्।

समस्या समाधानको जिम्मा संघीय सरकारको मात्र नभएर प्रदेश सरकार र स्थानीय सरकारको भूमिका महत्वपूर्ण हुने उनले बताइन् ।