सरकारद्वारा २८ सय ७ जना सुरक्षाकर्मीलाई शहीद घोषणा

काठमाडौं । दुई हजार ८ सय ७ जना सुरक्षाकर्मीलाई सरकारले शहीद घोषणा गरेको छ ।सशस्त्र प्रहरीको १८ औं वार्षिक उत्सवका अवसरमा आयोजित कार्यक्रममा प्रधानमन्त्री केपी शर्मा ओलीले राष्ट्रसेवाको क्रममा ज्यान गुमाएका नेपाली सेनाका१ हजार १८, नेपाल प्रहरीका १४ सय ४८, सशस्त्र प्रहरीका ३ सय १८ र अनुसन्धानको २३ जनालाई सोमबार बसेको मन्त्रीपरिषद्को बैठकले सहिद घोषणा गरेको जानकारी गराएका हुन् ।

बैठकले नेपाली सेना, सशस्त्र प्रहरी र राष्ट्रिय अनुसन्धान विभागमा कार्यरत रहेर शहादत प्राप्त गरेकाहरुलाई शहीद घोषणा गर्ने निर्णय गरेको थियो । देशका लागि कर्तव्यपालनका क्रममा ज्यान दिनेहरुप्रति असमान व्यवहार भएको गुनासो आएकोले त्यसको सम्बोधनका लागि सुरक्षाकर्मीहरुलाई शहीद घोषणा गरेको प्रधानमन्त्री ओलीले स्पष्ट पारे ।

मन्त्रिपरिषद् बैठकबाट कार्यक्षेत्रमा खटिएको अवस्थामा ज्यान गुमाएका सुरक्षाकर्मीहरुलाई शहीद दिवसको अवसर पारेर शहीद घोषणा गरिएको हो ।