पोग्बा चम्कँदा म्यान्यूको सहज जित, सोल्सायरको भविष्य मजबुत बन्दै

काठमाण्डौ । इंग्लिश प्रिमियर लिगमा म्यानचेस्टर युनाइटेडले जित दर्ता गरेको छ । गएराति भएको खेलमा युनाइटेडले बर्नेमाउथलाई ४ – १ गोल अन्तरले पराजित गरेको हो ।

घरेलु मैदानमा भएको खेलमा युनाइटेडको जितका लागि पाउल पोग्बाले दुई गोल, मार्कुस राष्फोर्ड र रोमेलो लुकाकुले एक गोलको योगदान गरेका थिए । बर्नेमाउथका नाथन एकेले सान्त्वना गोल फर्काएका थिए । म्यान्यूले बर्नेमाउथविरुद्ध खेलको पाँचौ मिनेटमा पोग्बाको गोलबाट अग्रता बनाएको थियो । खेलको ३३ औं मिनेटमा पोग्बाले व्यक्तिगत दोस्रो गोल गर्दा युनाइटेडको अग्रता २ – ० कायम भयो ।

खेलको ४५ औं मिनेटमा राष्फोर्डले गोल गरेपछि युनाइटेड ३ ० ले अघि रह्यो । तर, पहिलो हाफको इन्जुरी समयमा बर्नेमाउथका नाथन एकेले गोल गर्दै खेल ३ –१ को स्थितिमा ल्याएका थिए । त्यसपछि खेलको ७२ औं मिनेटमा लुकाकुले गोल गर्दै युनाइटेडलाई ४ – १ को सहज जित दिलाए । यस्तै खेलको ७९ औं मिनेटमा एरिक विलिले रातो कार्ड पाएपछि युनाइटेड १० खेलाडीमा सिमित भएको थियो ।
प्रशिक्षकमा ओले गुनर सोल्सायर आएपछि युनाइटेडको यो लगातार तेस्रो जित हो । खराब प्रदर्शन जारी रहेपछि मुख्य प्रशिक्षक जोसे मोरिन्होलाई बर्खास्त गर्दै युनाइटेडले सोल्सायरलाई प्रशिक्षणको जिम्मा दिएको थियो । यो जितसंगै युनाइटेडले २० खेलबाट ३५ अंक जोडेको छ । युनाइटेड लिगको छैटौं स्थानमा छ । बर्नेमाउथ २६ अंक जोडेर तालिकाको १२ औं स्थानमा रहेको छ ।