आर्सनलको पोष्टमा लिभरपुलको धावा,रोवर्टो फर्मिन्होकाे ह्याट्रिक

काठमाण्डौ । इंग्लिश प्रिमियर लिगमा शीर्ष स्थानमा रहेको लिभरपुलले आफ्नो विजय यात्रालाई जारी राखेको छ । शनिबार राति भएको खेलमा लिभरपुलले लण्डन क्लब आर्सनललाई ५–१ गोल अन्तरले पराजित गरेको हो ।

घरेलु मैदानमा भएको खेलमा लिभरपुल पाहुना टोली आर्सनललाई नमिठो हार चखाएर घर पठाउँदै अंक तालिकामा स्पष्ट तीन अंक जोड्न सफल भयो । रोवर्टो फर्मिनोको ह्याट्रिकसंगै लिभरपुलले दोस्रो स्थानमा रहेको टोटेनह्यामसंगको अंकदूरी ९ पुर्याएको छ । पहिलो हाफको ११ औं मिनेटमा आर्सनलका मैट्ल्याण्ड निल्सले सुरुवाति गोल गरेपनि आर्सनलले अग्रता जोगाउन सकेन ।

लिभरपुलका लागि थप २ गोल साडियो माने र मोहम्मद सलाहले गरेका थिए । जित संगै लिभरपुल उपाधिकोलागि बलियो बन्दै गएको छ । २० खेलबाट ५४ अंक सहित लिभरपुल शीर्ष स्थानमा कायम रहँदा टोटेनह्याम ४५ अंक सहित दोस्रो र एक खेल कम खेलेको साविकको विजेता म्यान्चेष्टर सिटी ४४ अंक सहित तेस्रो स्थानमा रहेको छ । हार संगै आर्सनल २० खेलबाट ३८ अंकसहित ५ औं स्थानमा रहेको छ ।